لاہور (یس ڈیسک) عوامی مسلم لیگ کے سربراہ شیخ رشید احمد کا کہنا ہے کہ حکومت نے فیصل آباد والی غلطی لاہور میں دہرائی تو مذاکرات خطرے میں پڑ جائیں گے، گیند حکومت کے کورٹ میں ہے، تصادم کا کوئی واقعہ جمہوریت اور جوڈیشل کمیشن کیخلاف سازش ہو گا۔ لاہور کے مقامی ہوٹل میں پریس کانفرنس کرتے ہوئے شیخ رشید نے کہا کہ حکومت عقل کے ناخن لے، نواز شریف اور شہباز شریف لچک دکھائیں، معاملات ٹھیک ہو گئے تو مذاکرات آگے چلیں گے۔
ان کاکہنا تھا کہ 23 مارچ تک یہ حکومت رہ گئی توبڑی بات ہو گی۔ شیخ رشید کا کہنا تھا کہ لاہور داتا کی نگری ہے، ایک دن دکانیں بند کرنے سے کوئی فرق نہیں پڑے گا، خواجہ سعد رفیق بڑے باپ کے چھوٹے بیٹے ہیں، رانا ثناء اللہ کو 72 گھنٹے کیلئے حوالے کردیں تو تمام مفروروں کو برآمد کرا دیں گے۔ شیخ رشید کا کہنا تھا کہ میاں نواز شریف نے قومی اداروں پر نااہل لوگوں کو لگا رکھا ہے، ملک میں جمہوریت کو نقصان پہنچا تو ذمہ دار میاں نواز شریف ہونگے۔
