بھوبنیشور (یس ڈیسک) ہاکی چیمپئنز ٹرافی کے لئے بھارت میں موجود پاکستانی ٹیم کے لئے سخت سیکیورٹی انتظامات کیے گئے ہیں۔
اسپیشل کمانڈوز اور پولیس کی 4 گاڑیاں حفاظت پر مامور ہیں، پولیس آفیشل ستیا بھراتا بھوئی کا کہنا ہے کہ کسی قسم کا خطرہ نہ ہونے کے باوجود گرین شرٹس پر دوسری ٹیموں کی بانسبت زیادہ توجہ دے رہے ہیں۔ تفصیلات کے مطابق چیمپئنز ٹرافی ہاکی ٹورنامنٹ ہفتے سے بھارتی شہر بھوبنیشور میں شروع ہورہا ہے۔ ایونٹ میں شرکت کیلیے پاکستان ، آسٹریلیا، انگلینڈ اور بلیجیئم سیمت تمام ٹیموں نے میزبان شہر میں ڈیرے ڈال دیے ہیں۔
منگل کو پہنچنے والی پاکستانی ٹیم کو انتہائی سخت سیکیورٹی میں ہوٹل سے اسٹیڈیم پریکٹس کے لیے لایا جاتا ہے، ٹورنامنٹ میں شریک دیگر ٹیموں کیلیے اسپیشل کمانڈوز اور پولیس کی 2گاڑیاں ڈیوٹی سر انجام دیتی ہیں جبکہ پاکستانی کھلاڑیوں کیلیے ان کی تعداد دگنی ہے۔
ڈپٹی سپرنٹنڈنٹ آف پولیس ستیا بھراتا بھوئی کا کہنا ہے کہ خفیہ اداروں کی جانب سے ملنے والی رپورٹ میں کسی بھی ٹیم کیلیے سیکیورٹی کے خدشات نہیں ہیں تاہم ہم نے یہ قدم پاکستانی کھلاڑیوں کو فول پروف سیکیورٹی فراہم کرنے کی غرض سے اٹھایا ہے۔
انھوں نے کہا کہ 6 دسمبر سے 14 تک جاری رہنے والے ایونٹ کے دوران 26 پلاٹون نفری غیر ملکی ٹیموں کی حفاظت پر معمور ہوگی، پولیس اسپیشل آپریشن گروپ میچز کے موقع پر اسٹیڈیم کے اندر موجود رہے گا۔ دوسری طرف معلوم ہوا ہے کہ ٹورنامنٹ شروع ہونے سے 2 روز قبل ہی گرائونڈ کو عام افراد کیلیے بند کردیا گیا۔
جس ہوٹل میں غیرملکی ٹیمیں قیام پذیر ہیں وہاں پر بھی پولیس کی خصوصی نفری تعینات ہے، غیرملکی کھلاڑیوں کیلیے 2 ایڈیشنل ڈپٹی کمشنرآف پولیس، 6 اسسٹنٹ کمشنرز، 10 انسپکٹرزاور 100 اہلکاروں کے ہمراہ اسپیشل فورسز کے کمانڈوز بھی سیکیورٹی کے فرائض سرانجام دیں گے۔
یادرہے کہ کالنگا اسٹیڈیم بھوبنیشور پہلی بار کسی بھی بڑے ہاکی ایونٹ کی میزبانی کررہا ہے، وہاں7 ہزار تماشائیوں کے بیٹھنے کی گنجائش ہے، ٹورنامنٹ میں کئی میچز مصنوعی روشنیوں میں بھی کھیلے جائیں گے۔ ہاکی انڈیا آفیشل انیرودھا بیسوال نے بتایا کہ نائٹ مقابلوں کے تمام تر ٹکٹ فروخت ہوچکے ہیں، امید ہے کہ ڈے میچز میں بھی ایسا ہو گا۔
