مظفر آباد: پاکستان مسلم لیگ نواز (پی ایم ایل این) نے آزاد جموں و کشمیر قانون ساز اسمبلی کی آٹھ میں سے چھ مخصوص نشستوں پر کامیابی حاصل کرتے ہوئے ایوان میں اپنی پوزیشن مزید مضبوط کر لی ہے۔ پاکستان پیپلز پارٹی (پی پی پی) نے خواتین کی بقیہ دو مخصوص نشستیں جیتیں۔
مخصوص نشستوں پر مسلم لیگ ن کی کامیابیاں
مسلم لیگ ن نے خواتین کی تین، علماء و مشائخ، سمندر پار کشمیریوں اور ٹیکنوکریٹس کی ایک ایک مخصوص نشست حاصل کی۔ خواتین کی مخصوص نشستوں پر مریم زمان، مریم ادریس اور سحرش قمر کامیاب قرار پائیں جبکہ سمندر پار کشمیریوں کی نشست عبدالرحمن آرائیں نے جیتی۔
ٹیکنوکریٹ نشست پر سید افتخار علی گیلانی اور علماء و مشائخ کی مخصوص نشست پر مولانا مظہر سعید منتخب ہوئے۔
قرعہ اندازی سے پیپلز پارٹی امیدوار کامیاب
مسلم لیگ ن کی امیدوار رفعت عابد اور پیپلز پارٹی کی زوبیہ خورشید نے پانچ پانچ ووٹ حاصل کیے۔ برابر ووٹ آنے کے بعد قرعہ اندازی کے ذریعے پیپلز پارٹی کی زوبیہ خورشید نشست جیت گئیں۔ اس سے قبل فرزانہ یعقوب بھی پیپلز پارٹی کے لیے مخصوص نشست حاصل کر چکی تھیں۔
مسلم لیگ ن کے قائد محمد نواز شریف اور پنجاب کی وزیر اعلیٰ مریم نواز شریف نے مری میں خواتین امیدواروں کے انٹرویوز بھی کیے تھے۔
اسمبلی میں مسلم لیگ ن کی عددی برتری میں اضافہ
حالیہ آزاد کشمیر عام انتخابات میں مسلم لیگ ن 45 میں سے 25 براہ راست نشستیں جیت کر سب سے بڑی پارلیمانی جماعت بن کر ابھری تھی۔ چھ اضافی مخصوص نشستوں کے بعد پارٹی کے ارکان کی تعداد قانون ساز اسمبلی میں 31 ہو گئی ہے جبکہ پیپلز پارٹی 14 نشستوں کے ساتھ دوسرے نمبر پر ہے۔
مخصوص نشستوں کے نتائج کے بعد ایوان میں مسلم لیگ ن کی پوزیشن مزید مستحکم ہو گئی ہے۔ عوامی دست و بازو اسمبلی کے رکن ساجد عباسی کی حمایت سے اسمبلی میں مسلم لیگ ن کے ارکان کی تعداد 32 تک پہنچ گئی ہے۔
