اسلام آباد: صدر مملکت آصف علی زرداری اور وزیراعظم شہباز شریف نے پاکستان کے سب سے کم عمر نشان حیدر پانے والے پائلٹ آفیسر راشد منہاس شہید کو ان کی 55ویں یوم شہادت پر زبردست خراج عقیدت پیش کیا ہے اور ملک کے دفاع کے لیے ان کی لازوال قربانی کو سراہا ہے۔
صدر زرداری کا پیغام: جرات اور فرض شناسی کی لازوال مثال
صدر آصف علی زرداری نے اپنے پیغام میں کہا کہ راشد منہاس شہید نے کم عمری میں ملک کے لیے اپنی جان کا نذرانہ پیش کرکے جرات، فرض شناسی اور حب الوطنی کی ایسی مثال قائم کی جو ہمیشہ یاد رکھی جائے گی۔ انہوں نے کہا کہ پاکستان کے سب سے کم عمر نشان حیدر یافتہ راشد منہاس کی عظیم قربانی ملکی تاریخ کا روشن باب ہے جو آنے والی نسلوں کو ہمت، عزم اور وفاداری کا پیغام دیتی رہے گی۔
قوم اپنے عظیم بیٹے کی قربانی کو ہمیشہ سراہے گی: صدر زرداری
صدر مملکت نے مزید کہا کہ قوم اپنے عظیم بیٹے، دیگر شہداء اور ان کے اہل خانہ کی قربانیوں کو ہمیشہ قدر کی نگاہ سے دیکھتی رہے گی۔ انہوں نے کہا کہ ملک کے دفاع میں جان قربان کرنے والے قومی ہیرو ہیں جن کی خدمات اور قربانیاں ہمیشہ یاد رکھی جائیں گی۔
وزیراعظم شہباز شریف کا خراج عقیدت
وزیراعظم شہباز شریف نے بھی اپنے علیحدہ پیغام میں کہا کہ راشد منہاس شہید کی عظیم قربانی قوم کے لیے جرات، حب الوطنی اور فرض شناسی کی لازوال مثال ہے۔ انہوں نے کہا کہ راشد منہاس نے مادر وطن کے دفاع اور قومی وقار کے لیے اپنی جان قربان کی اور ان کی غیر معمولی بہادری اور قربانی ہمیشہ قوم اور پاکستان کی مسلح افواج کے لیے مشعل راہ رہے گی۔
ملکی خودمختاری کے تحفظ کے عزم کا اعادہ
وزیراعظم نے شہید کے درجات کی بلندی کے لیے دعا کی اور کہا کہ پوری قوم اپنے عظیم شہداء کی قربانیوں کو ہمیشہ یاد رکھے گی۔ شہباز شریف نے پاکستان کی خودمختاری، علاقائی سالمیت اور قومی مفادات کے تحفظ کے عزم کا اعادہ کرتے ہوئے کہا کہ ملک کے لیے جان دینے والوں کی خدمات اور قربانیوں کو ہمیشہ بلند ترین مقام حاصل رہے گا۔
20 اگست 1971 کی عظیم قربانی
واضح رہے کہ پائلٹ آفیسر راشد منہاس شہید نے 20 اگست 1971 کو ملک کے دفاع کے دوران ایک سازش ناکام بناتے ہوئے اپنی جان کا نذرانہ پیش کیا تھا اور انہیں پاکستان کا سب سے بڑا فوجی اعزاز نشان حیدر عطا کیا گیا تھا۔
