اسللام آباد(ایس ایم حسنین)اسلامی دنیا کی پہلی خاتون وزیراعظم شہید محترمہ بے نظیر بھٹو کی 13ویں برسی کے موقع پر انہیں خراجِ عقیدت پیش کرنے کے لیے پہلی وزارت عظمیٰ کے دوران اس دنیا میں آنے والی ان کی بڑی صاحبزادی بختاور بھٹو زرداری نے سوشل میڈیا کا رخ کیا ہے۔ بختاور بھٹو زرداری نے اپنے تصدیق شدہ ٹوئٹر اکاؤنٹ پر اپنی والدہ کے خوبصورت خاکے کی تصویر شیئر کی ہے۔ ٹوئٹر پر شیئر کی جانے والی شہید محترمہ بےنظیر بھٹو کا خاکہ ایک فوٹو فریم میں نصب کر کے دیوار پر لگایا گیا ہے اور بختاور بھٹو نے اپنی والدہ سے محبت کا اظہار کرنے کے لیے کیپشن میں دل اور پھول والا ایموجی بھی شامل کیا ہے اُن کے اس خوبصورت ٹوئٹ پر کچھ ہی دیر میں ہزار سے زائد لائکس آچکے ہیں جبکہ صارفین شدت سے شہید محترمہ بےنظیر بھٹو کو یاد کر رہے ہیں۔
خیال رہے کہ بے نظیر بھٹو 21 جون 1953ء میں پیدا ہوئیں وہ ذوالفقار علی بھٹو اور بیگم نصرت بھٹو کی سب سے بڑی بیٹی تھیں۔ جلا وطنی کے بعد 18 اکتوبر 2007ء کو بے نظیر بھٹو کراچی واپس آئیں جہاں ان کے قافلے پر حملہ کیا گیا جس کے نتیجے میں درجنوں افراد ہلاک ہو گئے تاہم حملے میں بے نظیر بھٹو محفوظ رہیں لیکن 27 دسمبر 2007ء کو راولپنڈی کے لیاقت باغ میں قاتلانہ حملے میں انہیں دہشت گردوں نے شہید کر دیا۔
