جاپان کے وزیرخارجہ کے ذریعے جی 7 اور جی 20 ممالک سے قرضوں میں نرمی کے مطالبے پر وکالت کا مطالبہ

اسلام آباد(اصغر علی مبارک) جاپان جی۔7 اور جی۔20 کا اہم ترین رکن ہے توقع ہے کہ جاپان گلوبل ڈیٹ ریلیف کی تجویز کو آگے بڑھانے میں اپنا بھرپور کردار ادا کرے گا۔ وزیر خارجہ مخدوم شاہ محمود قریشی کی جاپانی ہم منصب توشی مِٹسو موٹیجی سے ٹیلی فون گفتگو کی جس میں انھوں نے وزیر اعظم عمران خان کے مجوزہ ”گلوبل ڈیٹ ریلیف” کے خدوخال سے جاپانی وزیر خارجہ کو آگاہ کرتے ہوئے اس توقع کا اظہار کیا ہے کہ جاپان جی۔7 اور جی۔20 کا اہم رکن ہونے کے ناطی گلوبل ڈیٹ ریلیف کی تجویز کو آگے بڑھانے میں اپنا بھرپور کردار ادا کرے گا۔ دونوں وزرائے خارجہ نے دو طرفہ تعلقات کو فروغ دینے اور کورونا کی وبائی صورتحال سمیت اہم امور پر مشاورت جاری رکھنے پر اتفاق کیا۔بات چیت کے دوران کورونا وائرس کی وبا کے چیلنج اور اس کے مضمرات کے حوالے سے تفصیلی تبادلہ خیال کیا گیا۔ ترجمان دفتر خارجہ کے مطابق وزیر خارجہ نے کورونا وائرس کے پھیلاؤ کو روکنے کیلئے جاپانی حکومت کی جانب سے کیے گئے بروقت اور مؤثر اقدامات کی تعریف کی۔ وزیر خارجہ نے کورونا وائرس کی وبا کے باعث جاپان میں ہونے والے جانی نقصان پر گہرے دکھ اور افسوس کا اظہار کرتے ہوئے جاپانی وزیر خارجہ سے اظہار تعزیت کیا۔ شاہ محمود قریشی نے کہا کہ موجودہ وبائی چیلنج اس صدی میں انسانیت کو درپیش بڑے چیلنجز میں سے ایک ہے جس نے پوری دنیا کو اپنی لپیٹ میں لے رکھا ہے۔ وزیر خارجہ نے کورونا وائرس کی وباء اور ٹڈی دل حملے کے دوران پاکستان کی معاونت پر جاپانی حکومت کا شکریہ ادا کیا اور کہا کہ پاکستان اپنے محدود وسائل کے ساتھ ایک طرف کورونا وبا کے پھیلاؤ کو روکنے اور دوسری جانب اپنے عوام کو بھوک سے بچانے کیلئے اپنی تمام تر توانائیاں صرف کر رہا ہے۔ وزیر خارجہ نے کورونا وباء کے معاشی مضمرات سے نمٹنے اور اس مشکل وقت میں، ترقی پذیر ممالک کیلئے معاشی معاونت کی فراہمی کیلئے، وزیر اعظم عمران خان کے مجوزہ ”گلوبل ڈیٹ ریلیف” کے خدوخال سے جاپانی وزیر خارجہ کو آگاہ کیا۔ انہوں نے کہا کہ ہمیں توقع ہے کہ جاپان جی۔7 اور جی۔20 کا اہم رکن ہونے کے ناطے، اس گلوبل ڈیٹ ریلیف، تجویز کو آگے بڑھانے میں اپنا بھرپور کردار ادا کرے گا۔ وزیر خارجہ نے اپنے جاپانی ہم منصب کو مقبوضہ جموں و کشمیر کی تشویشناک صورتحال سے آگاہ کرتے ہوئے کہا کہ ایک طرف دنیا کرونا وبا سے نمٹنے میں مصروف عمل ہے تو دوسری طرف بھارت مقبوضہ کشمیر میں انسانی حقوق کی خلاف ورزیوں کا سلسلہ مسلسل جاری رکھے ہوئے ہے۔ موجودہ وبائی صورتحال میں ضرورت اس امر کی ہے کہ عالمی برادری، مقبوضہ جموں و کشمیر میں گذشتہ 9 ماہ سے جاری بدترین کرفیو کے خاتمے کیلئے اقدامات پر دباؤ ڈالے تاکہ 80 لاکھ نہتے، مظلوم کشمیریوں کو خوراک اور ادویات کی فراہمی ممکن ہو سکے ۔ وزیر خارجہ نے بھارتی سرکار کی جانب سے مسلمانوں کو کورونا وباء کے پھیلاؤ کا ذمہ دار قرار دینے اور ہندوستان میں بڑھتے ہوئے اسلاموفوبیا کے واقعات پر، جاپانی وزیر خارجہ کو پاکستان کی تشویش سے آگاہ کیا۔ دونوں وزرائے خارجہ نے پاک جاپان تعلقات کے فروغ اور سفارتی تعلقات کی 70ویں سالگرہ بھرپور طریقے سے منانے اور کورونا وبائی صورتحال سمیت اہم امور پر مشاورت جاری رکھنے پر اتفاق کیا۔