پیپلز پارٹی ملک میں صحیح معنوں میں جمہوریت چاہتی ہے، شہدا کا خون کبھی رائیگاں نہیں جائیگا، عبدالستار ملک
پیرس/اسلام آباد(ایس ایم حسنین) پاکستان پیپلز پارٹی فرانس کے مرکزی راہنما عبدالستار ملک نے کہا ہے کہ پیپلز پارٹی ملک میں صحیح معنوں میں جمہوریت چاہتی ہے ۔ اور پیپلز پارٹی نے ملک کو جسطرح مشرف آمریت سے نجات دلائی آج اس سوچ اور قیادت اورویژن کیساتھ ایک بھی راہنما ملکی سیاست کے افق پرموجود نہیں ۔ مسلم لیگ ن لندن میں ٹامبک ٹوئیاں مار رہی ہے۔ جبکہ نتیجہ ندارد، کبھی مریم اور اس کے پاپا گرجتے برستے ہیں اور پھر اچانک جھاگ کی طرح بیٹھ کر ہوا ہوجاتے ہیں ۔ کیا یہی وہ لیڈرشپ تھی جس کے بارے میں یہ ثابت کرنے کی کوشش کی گئی کہ محترمہ شہید کے بعد میاں نواز شریف کے علاوہ کوئی لیڈر ہی موجود نہیں ۔
انہوں نے کہا کہ انتہائی دکھ کی بات ہے کہ بڑی پارٹی اپوزیشن کو تنہا چھوڑ کر لندن فرار ہوچکی ہے اور یہاں رہ کر بھی اپوزیشن کو متحد کرنے کی کوئی کوشش نہیں کی گئی ہے۔ انشااللہ شہدا کا خون کبھی رائیگاں نہیں جائیگا اور چیئرمین بلاول بھٹو زرداری ظلم کی تاریک رات میں سے جمہوریت کا روشن دن ضرور نکالنے میں کامیا ب ہونگے۔ وہ اپنی والدہ اور نانا کی طرح عظیم راہ پر چل نکلے ہیں اور اللہ تعالیٰ اورحبیب خدا صلی اللہ وعلیہ وآلہ وسلم کی مدد سے ضرور سرخرو ہونگے۔
