اسلام آباد (ویب ڈیسک) پاکستان پیپلز پارٹی کی سیکریٹری اطلاعات ڈاکٹر نفیسہ شاہ کا کہنا ہے کہ سلیکٹڈ الوداعی جلسے کر رہے ہیں،ان کا لب و لہجہ ہی بتا رہا ہے کہ وہ بخشش میں دئیے گئے اقتدار سے جانے کی تیاری کر چکے ہیں۔
وزیراعظم عمران خان کے گلگت بلتستان میں خطاب پر ردعمل کا اظہار کرتے ہوئے ڈاکٹر نفیسہ شاہ کا کہنا تھا کہ چندہ چور کی سونامی نے ایک سال ملک کی معیشت کا جنازہ نکال دیا ہے، پی ٹی آئی ایم ایف نے ملک کو گروی رکھ دیا ہے۔ انہوں نے سوال کیا کہ سلیکٹڈ بتائیں کہ ان کی حکومت میں قومی خزانے سے ڈالر کیسے غائب ہوا اور ڈالر کی قیمت میں ریکارڈ اضافے کا ذمےدار کون ہے؟۔ انہوں نے کہا کہ قوم پوچھ رہی ہے کہ اب بجلی، گیس، پٹرول کی قیمتوں میں اضافے کی رقم کون چوری کر رہا ہے؟۔ انہوں نے کہا کہ عوام سے دو وقت کی روٹی چھین لی گئی ہے، لاکھوں لوگوں کو بیروزگار اور بے گھر کر دیا گیا ہے،سلیکٹڈ کا ایک دن کا بھی انتظار عوام کی مشکلات میں اضافہ کر رہا ہے۔ دوسری جانب ایک خبر کے مطابق وزیراعظم عمران خان نے کہا ہے کہ مولانا فضل الرحمن کے ہوتے ہوئے یہودیوں کو کسی سازش کی کیا ضرورت ہے؟بھارتی میڈیا فضل الرحمن کو دکھا دکھا کر خوش ہورہ اہے ، ایسا لگتا ہے مولانا بھارتی شہری ہیں اور بھارت کیلئے کوئی ملک آزاد کر نے آرہے ہیں ،جس طرح ووٹ لینے اور پیسے بنانے کے کیلئے اسلام کو استعمال کیا جاتا ہے یہ اسلام کو نقصان پہنچاتا ہے،وہ دن چلے گئےجب یہ اقتدار لینے کے لیے مذہب کو استعمال کرتے تھے ،جتنی مرضی دیر آپ نے بیٹھنا ہے بے شک بیٹھیں ، آپ کو این آر او نہیں دوں گا۔ جمعہ کو یہاں جلسہ عام سے خطاب کرتے ہوئے وزیراعظم عمران خان نے کہا کہ انہوں نے کہا کہ ہم یہاں گلگت بلتستان کے یومِ آزادی کا جشن منارہے ہیں اور ایک آزادی مارچ اسلام آباد میں ہورہا ہے، اب دیکھنا یہ ہے کہ وہ اسلام آباد میں کس سے آزادی لینے آرہے ہیں؟۔وزیراعظم عمران خان نے کہا کہ وہاں بڑی تعداد میں لوگ میں جمع ہیں، میں چاہتا ہوں کہ پاکستان کا میڈیا جا کر لوگوں سے پوچھے تو سہی کہ وہ کس سے آزادی لینے آئے ہیں؟
