ٹاٹنگھم: ورلڈ کپ کا آغاز ہو گیا ہے او ر پہلا میچ آج انگلینڈ اور جنوبی افریقہ کے درمیان کھیلا جائے گا تاہم پاکستان اپنا پہلا میچ کل ویسٹ اندیز کے خلاف کھیلے گا تاہم اس سے قبل حسن علی، امام الحق، کپتان سرفراز اور شعیب ملک اکھٹے ہوئے اور انہوں نے اپنے ساتھی کھلاڑیوں کی ان عادات سے پردہ اٹھایا جو کہ شائد اس سے پہلے عام لوگوں کو معلوم نہیں تھیں۔
تفصیلات کے مطابق انٹر نیشنل کرکٹ کونسل کے مزاح سے بھر پور” کویک فائر راﺅنڈ “ میں سرفراز ، شعیب ملک ، امام الحق اور حسن علی نے شرکت کی ۔جب ٹیم میں سب سے زیادہ سیلفیاں لینے والے پلیئر کے بارے میں معلوم کرنے کی کوشش کی گئی تو کپتان سرفراز نےامام الحق کی پیٹھ پر تھپکی دی اور کھلاڑی کے چہرے پر ایسے اثرات مرتب ہوئے جیسے وہ رنگے ہاتھوں پکڑے گئے ہوں تاہم شعیب ملک سوچتے ہیں کہ ٹیم کے تمام کھلاڑی ہی سیلفیوں کے شوقین ہیں ۔ امام الحق نے کہا کہ سب سے زیادہ خراب روم میٹ بابر اعظم ہے تاہم شعیب ملک کا ماننا ہے کہ یہ اعزاز دراصل وہاب ریاض پر زیادہ فٹ آئے گا۔ جب تینوں سے سوال کیا گیا کہ ٹیم میں سب سے زیادہ خراب گانوں کا ذوق کس کا ہے جس پر سرفراز نے کہا کہ فہیم اشرف بہت ہی بے تکے سے گانے سنتا ہے تاہم شعیب کا کہنا ہے کہ سب سے زیادہ عجیب گانے فخر زمان کے ہوتے ہیں کیونکہ وہ پشتو گانے سنتا ہے جس کی ہمیں سمجھ ہی کچھ نہیں آتی ۔
