لاہور: وزیراعلی پنجاب اور مسلم لیگ ن کے صدر شہباز شریف نے کہا ہے کہ زرداری اور نیازی دونوں نے اپنے صوبوں کا حلیہ بگاڑ دیا، باشعور عوام زرداری اور نیازی دونوں بھائیوں کو پہچان چکے ہیں۔

وزیراعلیٰ پنجاب شہباز شریف نے اپنے ایک بیان میں کہا کہ مسلم لیگ (ن) کی حکومت کی کارکردگی سب کیلئے رول ماڈل ہے، تعلیم، صحت اور دیگر شعبوں کی بہتری کیلئے انقلابی اصلاحات کے پروگرام پر محنت سے کام کیا۔ انہوں نے مخالفین پر تنقید کرتے ہوئے کہا کہ خیبر پختونخوا اور سندھ میں عوام کو بری طرح نظرانداز کیا گیا ہے، اصول کی سیاست کے دعویدار سیاستدانوں نے وصولی کرکے بے اصولی کا نیا ریکارڈ بنایا ہے، پاکستان کے باشعور عوام زرداری اور نیازی دونوں بھائیوں کو پہچان چکے ہیں۔

شہباز شریف کا مزید کہنا تھا کہ مسلم لیگ (ن) کی حکومت کے فلاح عامہ کیلئے بے مثال اقدامات ان عناصر کی سیاست کو دفن کردیں گے، آئندہ الیکشن خدمت، دیانت اور شفافیت کی جیت کی نوید لائے گا۔