اسلام آباد کے نجی ہوٹل میں آتشزدگی کے باعث دم گھٹنے سے خاتون جاں بحق ہوگئی۔ آگ لگنے سےزیادہ 10 افراد متاثر ہوئے جنہیں پمز اسپتال منتقل کردیا گیا۔

Woman killed in Islamabad hotel fire

پولیس ذرائع کے مطابق راول ڈیم چوک کے قریب نجی ہوٹل میں شارٹ سرکٹ کے باعث ایک کمرے میں آگ لگی، کمرے میں موجود افراد نے بھاگ کر اپنی جان بچائی، آگ لگنے کے بعد دھواں بھرگیا اور برابر والے کمرے میں ٹھہری ہوئی 60 سالہ خاتون الماس فاطمہ دم گھٹنے سے جاں بحق ہوگئی۔پولیس کے مطابق الماس فاطمہ کا تعلق کراچی سے ہے اور وہ ہوٹل میں اکیلی ٹھہری ہوئی تھی، ریسکیو اہلکاروں نے خاتون کی لاش پمز اسپتال منتقل کردی ہے، دھوئیں کے باعث دم گھٹنے سے 10 افراد متاثر ہوئے جنہیں پمز اسپتال منتقل کیا گیا جہاں ابتدائی طبی امداد کے بعد انہیں روانہ کردیا گیا۔ریسکیو ذرائع کے مطابق آگ لگنے سے ہوٹل کے 5 کمرے متاثر ہوئے اور فائر بریگیڈ کی 2 گاڑیوں نے موقع پر پہنچ کرآگ پرقابو پایا۔ذرائع کا کہنا ہے کہ پولیس نے الماس فاطمہ کے اہل خانہ کی تلاش کے لیے رابطے شروع کردئیے ہیں۔