لاہور: پی سی بی کی جانب سے لاہور میں شیڈول تینوں میچز بھی کراچی منتقل کرتے ہوئے وجہ بتائی کہ قذافی سٹیڈیم میں مقابلوں کیلئے نشریاتی ادارے کی تیاریوں کے ساتھ ٹیموں اور آفیشلز کو مسائل درپیش آتے، اس لیے تمام 8 میچ کراچی میں کرانے کا فیصلہ کیا تفصیلات کے مطابق پی ایس ایل فور کے پہلے مرحلے میں دبئی انٹرنیشنل کرکٹ سٹیڈیم پر7میچز کھیلے گئے ، تاہم نشریاتی حقوق رکھنے والی بھارتی کمپنی نےمودی سرکارکے منفی پروپیگنڈے کا بھرپور ساتھ دیتے ہوئے ایونٹ کے باقی میچز براہ راست دکھانے سے انکار کردیا ، اس وقت شارجہ میں مقابلے شروع ہونے میں 2 دن باقی تھے اور پی سی بی نے اس وقفے میں نئی کمپنی کی خدمات حاصل کرلیں ، اب ابوظہبی میں بھی براہ راست نشریات کا سلسلہ جاری ہے ، پی سی بی کی جانب سے لاہور میں شیڈول تینوں میچز بھی کراچی منتقل کرتے ہوئے وجہ بتائی گئی کہ پروازیں تاخیر سے کھلنے کی وجہ سے قذافی سٹیڈیم میں مقابلوں کیلئے نشریاتی ادارے کی تیاریوں کے ساتھ ٹیموں اور آفیشلز کو مسائل درپیش آتے، اس لیے تمام 8 میچ کراچی میں کرانے کا فیصلہ کیا گیا ہے، بھارتی کمپنی کے انکار پر نشریاتی معاملات سنبھالنے والے ادارے کے پاس اتنے وسائل نہیں تھے کہ وہ بیک وقت2سٹیڈیمز میں اپنی تنصیبات کا اہتمام کرسکتا، پی سی بی کو بھی اسکا اندازہ تھا، 28فروری کوپریس کانفرنس میں چیئرمین پی سی بی احسان مانی نے لاہور اور کراچی میں میچز شیڈول کے مطابق کرانے کا اعلان کیا تواس وقت بھی براڈ کاسٹنگ سے متعلق سوال پر انھوں نے کہا تھا کہ مسائل ہوسکتے ہیں لیکن ان کا حل تلاش کرلیا جائے گا،ذرائع کے مطابق تنصیبات کیلئے وسائل اور وقت دونوں درکار ہوتے ہیں، دونوں کی کمی کے پیش نظر تمام میچز کراچی میں اور وہ بھی7کے بجائے9مارچ سے شروع کرانے کا فیصلہ کیا گیا، یہ بھی معلوم ہوا ہے کہ نیشنل سٹیڈیم میں میچز کیلئے سپائیڈر کیمرہ ٹیم کے بھی پاکستان آنے کا امکان نہیں ہے۔