لندن: تحریک انصاف کے چیئرمین عمران خان کی سابق اہلیہ ریحام خان نے آئندہ ہفتے لندن میں اپنی کتاب لانچ کرنے کا فیصلہ کرلیا ہے۔
انگریزی جریدے’مارننگ میل‘ کے مطابق ریحام خان نے اپنی کتاب میں سابق شوہر عمران خان اور ڈاکٹراعجاز خان پر کئی الزامات عائد کیے جبکہ مصنفہ کو بھی میاں بیوی کے درمیان قابل اعتماد تعلقات کو عزت نہ دینے پر تنقید کی جارہی ہے جبکہ ایک پاکستانی تارک وطن نے لندن کی ایک عدالت میں ریحام کی کتاب کے مواد کیخلاف پٹیشن بھی دائرکردی۔
یہ بھی الزام عائد کیاجارہاہے کہ عمران خان سے طلاق کے بعد ریحام خان نے مبینہ طورپر امیرمقام اور شہبازشریف کے ذریعے مسلم لیگ ن سے رابطے استوار کرلیے ہیں اور تب سے ہی وہ مسلم لیگ ن کے ہاتھوں میں کھیل رہی ہیں، جیسے ہی الیکشن کمیشن نے عام انتخابات کی تاریخ کا اعلان کیاتو ریحام خان نے بھی اپنی کتاب لانے کا اعلان کردیا۔ ذرائع کے حوالے سے بتایاگیاکہ مسلم لیگ ن کی قیادت نے ریحام خان کو مشورہ دیا ہے کہ اپنی کتاب کی تقریب رونمائی میں مختلف سیاسی جماعتوں کے لوگوں کو مدعو کریں تاکہ کتاب پر مسلم لیگ ن کا ٹھپہ نہ لگے۔کتاب پر تحفظات کا اظہار کرتے ہوئے اوورسیز پاکستانیوں نے اسے اسلامی روایات اور اقدار کے منافی قراردیا۔
