counter easy hit

11 سال قبل شروع ہونے والے میگا پراجیکٹس کی تکمیل کا وقت

لاہور: پنجاب حکومت نے اتحادی جماعت ق لیگ کے تمام مطالبات تسلیم کر لیے ہیں، حکومت نے 11سال بعد ق لیگ کے زیرالتواء میگا پراجیکٹس کو مکمل کرنے کا فیصلہ کرلیا، یہ فیصلہ وزیراعلیٰ پنجاب عثمان بزدار اور چودھری برادران کے درمیان ملاقات میں کیا گیا۔ میڈیا رپورٹس کے مطابق ق لیگ کے صدر چودھری شجاعت سے وزیراعلیٰ پنجاب سردار عثمان بزدار نے گزشتہ روز ان کی رہائشگاہ پر ملاقات کی تھی۔ملاقات میں اسپیکر پنجاب اسمبلی چودھری پرویزالٰہی، ارکان قومی اسمبلی مونس الٰہی، سالک حسین، حسین الٰہی، راسخ الٰہی اور وزیراعلیٰ کے ترجمان ڈاکٹر شہباز گل بھی موجود تھے۔ چودھری شجاعت حسین نے وزیراعلیٰ عثمان بزدار کو عمرہ پر دلی مبارکباد دیتے ہوئے کہا کہ آپ کسی قسم کی فکر نہ کریں انشاءاللہ ہماری جماعت پنجاب حکومت کے ساتھ بھرپور اور مثالی تعاون جاری رکھے گی۔ملاقات میں پنجاب اسمبلی کے امور، آئندہ قانون سازی اور پنجاب میں ترقیاتی منصوبوں پر بھی تبادلہ خیال کیا گیا جبکہ صوبائی وزیر معدنیات حافظ عمار یاسر کا استعفیٰ واپس ہو گیا۔ جس کے بعد انہوں نے آج سے اپنے دفتر میں بیٹھنا شروع کر دیا ہے۔ اس موقع پر طے کیا گیا کہ پنجاب میں سابقہ دور میں بند کئے گئے غیر ملکی سرمایہ کاری والے ایسے میگا پراجیکٹس پر جلد کام دوبارہ شروع کیا جائے گا جن سے ہزاروں افراد کو روزگار ملنا تھا۔اس سلسلہ میں سب سے پہلے لاہور میں النہیان سنٹر پر کام بحال کیا جائے گا تاکہ زیادہ سے زیادہ لوگوں کو روزگار مل سکے جبکہ پنجاب میں ترقیاتی کام جلد مکمل کرنے کیلئے ایم پی ایز سے ترقیاتی اسکیمیں وصول کرنے کے علاوہ فنڈز جاری کئے جا رہے ہیں۔ علاوہ ازیں چولستان کے ہر غریب گھرانے کو ایک ایک سولر پینل فری دیا جائے گا جس سے دو پنکھے اور بلب چل سکیں۔