ممبئی(ویب ڈیسک) اداکار سیف علی خان کی بیٹی اور بالی ووڈ اداکارہ سارہ علی خان نے اپنے بڑھے ہوئے وزن سے جنگ کی کہانی سوشل میڈیا پر شیئر کردی ۔فلم’کیدار ناتھ‘ سے ڈیبیو کرنے والی اداکارہ جو آج ٹی وی اسکرین پر خوبصورت اور فٹ نظر آتی ہیں چند سال قبل تک بہت موٹی تھیں اور ان کا وزن 96 کلوگرام تک پہنچ چکا تھا تاہم شاید آپ یہ نہیں جانتے ہونگے کہ سارہ علی خان پولیسٹک اووری ڈس آرڈر (پی سی او ڈی) نامی ایک بیماری میں مبتلا ہیں۔اس بیماری میں عموماً خواتین مبتلا ہوتی ہیں اور بھارت میں تقریباً ہر 10 میں سے ایک خاتون اس بیماری میں مبتلا ہے۔ انہوں نے کہا وہ اب بھی پی سی او ڈی میں مبتلا ہیں اور اسی بیماری کی وجہ سے ان کا وزن بے تحاشہ بڑھ گیا تھا ۔ دراصل یہ بیماری ایک ہارمونل مسئلہ ہے اس بیماری میں خواتین کا وزن بے تحاشہ بڑھ جاتاہے اور اسے کم کرنا تقریباناممکن ہوتا ہے ۔اس کے علاوہ اس بیماری میں مبتلا خواتین کو جلد اوربالوں کے مسائل کا سامنا بھی کرنا پڑتا ہے جب کہ اس بیماری میں مبتلا خواتین کو 40 سال کی عمر کے بعد ذیابیطس اور بانجھ پن کا خطرہ بھی ہوتا ہے۔ سارہ کا کہنا ہے کہ پی سی او ڈی کا مستقل کوئی حل نہیں بہر حال اس پر قابو پایا جا سکتا ہے جیسے کہ میں نے پایا ، مزید بتاتی ہیں جب میں کولمبیا میں تھی اور میرا وزن 96 کلوگرام تھا اس وقت مجھے احساس ہوا کہ میں اداکارہ بننا چاہتی ہوں لیکن اتنے وزن کے ساتھ یہ بہت مشکل تھا تاہم میں نے اپنی بے تحاشہ کھانے کی عادت پر قابو پایا اوراپنے وزن کو 96 سے 52 کلوگرام تک لانے کیلئے کڑی محنت کی۔ نہ صرف جم جاکر اپنے وزن کو کم کیا بلکہ صحت بخش غذائیں بھی کھائیں۔ اب سارہ علی خان کا شمار بالی وڈ کی خوبصورت اداکاراؤں میں ہوتا ہے اور آج وہ ان تمام خواتین کے لیے مثال ہیں جو موٹاپے سے پریشان ہیں ۔