اسلام آباد (ویب ڈیسک) پاکستان مسلم لیگ (ق) کے سینئر رہنما ء کامل علی آغا نے انکشاف کیا ہے کہ شریف برادران کی جانب سے مسلم لیگ (ق) کو وزارت اعلیٰ کی پیشکش کی گئی تھی لیکن ہم وزارتوں کے پیچھے بھاگنے والوں میں سے نہیں ، اگر کسی کو میری بات کا یقین نہیں تو وہ شہباز شریف سے پوچھ لے ، کامل علی آغا نے کہا کہ ہم نے ملکی مفاد میں تحریک انصاف کیساتھ تعاون کیا۔نجی ٹی وی سے گفتگو کرتے ہوئے کامل علی آغا نے کہا کہ ہماری قیادت میں زیر ک اوردرگزر کرنیوالے لوگ شامل ہیں، مگر ہمیں اب تحریک انصاف کی حکومت سے گلے شکوے شروع ہو گئے ہیں اور اسکی وجہ یہ ہے کہ ضلعی سطح پر انتظامیہ کو ہدایت کی گئی ہے ہمارے لوگوں کیساتھ تعاون نہیں کرنا اور انکی جگہ پر جو ہارے ہوئے لوگ ہیں ان کیساتھ تعاون کیا جائے۔ ہم نے اس پر توجہ دلانے کی کوشش کی لیکن پھر بھی رویہ نہیں بدلا گیا ۔ یہ عد م تعاون عدم برداشت تک پہنچ گیا کہ ہمارے ایک صوبائی وزیر نے استعفیٰ دیدیا،ہماری تحریک انصاف کی قیادت سے بات چیت ہورہی ہے اور معاملا ت بہتری کی طرف جارہے ہیں۔چودھری برادران ہمیشہ کھلے دروازے کی سیاست کرتے ہیں، ہمارے رابطے چلتے رہتے ہیں لیکن سب سن لیں تحریک انصاف کے خلاف جانیوالے کسی کام میں ہمارا پیپلز پارٹی اور (ن) لیگ سمیت کسی سے کوئی رابطہ نہیں ۔ (ش س م)