شارجہ: پاکستانی بیٹسمین سمیع اسلم ٹیسٹ کرکٹ میں مسلسل اچھی کارکردگی کے باوجود سنچری بنانے سے محرومی پر افسردہ ہیں ۔ ان کا کہنا ہے کہ کھیل میں ان کی توجہ اور یکسوئی میں کمی نہیں ہے اور وہ گیند سے اچھی طرح نمٹ رہے ہیں ۔ سمیع اسلم نے کہا کہ ان کا ذاتی طور پر خیال ہے کہ خراب شاٹ نے ایک اچھی اننگز کا خاتمہ کیا اور وہ اپنے سکور کو 100میں تبدیل نہ کر سکے ۔ ان کا کہنا تھا کہ بطور اوپنر بڑے شاٹ کھیل کر اچھا آغاز فراہم کرنا ہوتا ہے اور اگر ان کے ملک میں ڈومیسٹک ریکارڈ کو دیکھا جائے تو وہ میچوں میں کئی مرتبہ سنچریاں بنا چکے ہیں اور ان کا اپنی اننگز کو سنچری میں ڈھالنے کا تناسب بھی بہترین ہے لہٰذا حالیہ ٹیسٹ میں جو کچھ ہوا اس پر انہیں بھی مایوسی ہے کہ وہ پانچ روزہ کرکٹ میں اولین سنچری کا جشن نہیں منا سکے ۔ یاد رہے کہ سمیع اسلم نے گزشتہ سال بنگلہ دیش کے خلاف ٹیسٹ ڈیبیو کے بعد سے سات میچوں میں پانچ نصف سنچریاں بنا رکھی ہیں ۔ دوسری جانب ویسٹ انڈین سپنر دیوندرا بشو کا کہنا ہے کہ پاکستان کو 300 رنز کے اندر آؤٹ کرنے کی کوشش کی جائے گی ۔ گیبریل کے ساتھ دوسرے میڈیم پیس بائولرز نے ممکنہ طور پر اچھی باؤلنگ کی جس سے پاکستان ٹیم کو دبائو میں لانے کے مواقع پیدا ہوئے جبکہ وکٹ سے بھی ابتدا میں سپنرز کو مدد ملی ۔