PTI Protest

کراچی (جیوڈیسک) پاکستان تحریک انصاف نے کراچی میں قومی اسمبلی کی نشست این اے246 میں ہونے والے ضمنی انتخاب کی انتخابی مہم کے لیے 19اپریل کو ایم کیو ایم کے مرکز90 کے قریب عزیزآباد کے جناح گراؤنڈ میں کراچی کی تاریخ کے سب سے بڑے جلسے کا اعلان کردیا۔

پیر کو کراچی میں پی ٹی آئی کے مرکزانصاف ہاؤس میں یومِ پاکستان کے موقع پر یوتھ کنونشن کاانعقاد کیا گیا۔ اس سے خطاب کرتے ہوئے پی ٹی آئی کے رہنما اسد عمر نے کہاکہ ایم کیوایم ڈوبتی کشتی ہے، این اے246 کے ضمنی انتخابات کے بعدایم کیو ایم تاریخ کا حصہ بن جائے گی۔

انھوں نے کہاکہ ایم کیو ایم کا ماضی ہے لیکن مستقبل نہیں، ایم کیو ایم کے ساتھ جو لوگ ہیںان سے کہتا ہوں پارٹی سے کنارہ کشی اختیار کرلیں۔ انھوں نے کہاکہ الطاف حسین سن لیں، پاکستان بنانا غلطی نہیں بلکہ مسلمانوں کی سب سے بڑی فتح ہے۔ کراچی پاکستان کا صرف دل ہی نہیں، دماغ بھی ہے۔

پی ٹی آئی کے رکنِ قومی اسمبلی عارف علوی نے کہا کہ این اے246 میں ایم کیوایم ماضی کی تاریخ بن جائے گی۔ اس حلقے پر شفاف انتخابات ہوئے توایم کیو ایم راہ فراراختیار کرے گی۔

اس موقع پرعلی زیدی نے عمران خان سے درخواست کی کہ ضمنی انتخابات سے پہلے 16سے 20 اپریل تک کراچی میں گزاریں۔ انھوں نے پی ٹی آئی کراچی کے کارکنوں سے اپیل کی کہ ضمنی انتخابات کی تیاری کے لیے این اے246 کا رخ کریں اور 19اپریل کو ہونے والے جلسے کو کامیاب بنائیں۔