counter easy hit

وزیراعظم اپنے پہلے دورہ سری لنکا پر آمدہ منگل کو روانہ ہونگے

اسلام آباد(ایس ایم حسنین) وزیر اعظم عمران خان سری لنکا کے وزیراعظم مہندرا راجا پاکسے کی دعوت پر آئندہ منگل کو اپنے پہلے دورہ سری لنکا پر روانہ ہونگے۔وزیراعظم عمران خان 23 سے 24 فروری کو سری لنکا کا دورہ کریں گے۔ وزارت عظمی کا منصب سنبھالنے کے بعد سری لنکا کا ان کا یہ پہلا دورہ ہوگا۔ ترجمان دفتر خارجہ کی جانب سے جاری ایک بیان میں بتایا گیا ہے کہ وزیراعظم کے ہمراہ ایک اعلی سطحی وفد بھی ہوگا جس میں کابینہ کے ارکان اور دیگر اعلی حکام شامل ہیں۔ وزیراعظم کے پروگرام میں صدر گوتابایا راجہ پاکسے اور وزیراعظم مہندا راجہ پاکسے سے ملاقاتیں شامل ہیں۔ بیان میں کہا گیا ہے کہ وزیراعظم وفود کی سطح پر بات چیت کی بھی قیادت کریں گے جس میں دونوں ممالک کے درمیان تجارت، سرمایہ کاری، صحت، تعلیم، سائنس اینڈ ٹیکنالوجی، دفاع، سکیورٹی، ثقافت اور سیاحت سمیت تمام شعبہ جات میں تعاون پر بات ہوگی۔ دوطرفہ امور کے علاوہ کلیدی علاقائی اور عالمی معاملات پر بھی تبادلہ خیال ہوگا۔ دورے کے دوران سری لنکا پاکستان پارلیمانی فرینڈشپ ایسوسی ایشن کی ازسرنوتشکیل کا بھی اعلان کیاگیا جائے گا جس سے دونوں ممالک کے درمیان پارلیمانی تبادلوں کو مزید فروغ ملے گا۔ وزیراعظم مشترکہ طورپر منعقد کردہ”تجارت اور سرمایہ کاری کانفرنس“ میں شریک ہوں گے جس کا مقصد دونوں ممالک کے درمیان تجارت اور سرمایہ کاری کا فروغ ہے۔دورے کے دوران دوطرفہ تعاون سے متعلق مفاہمت کی متعدد یاداشتوں پر بھی دستخط ہوں گے۔ ترجمان نے کہا ہے کہ1948 سے پاکستان اور سری لنکا کے درمیان قریبی، خوشگوار اور باہمی حمایت پر مبنی تعلقات استوار ہیں۔ دونوں ممالک عالمی اور علاقائی وسیع امور پر یکساں نکتہ نظر رکھتے ہیں۔ دونوں ممالک نے اقوام متحدہ اور سارک سمیت عالمی اور علاقائی فورمز پر قریبی اشتراک عمل سے کام کیا ہے۔ ترجمان کا کہنا ہے کہ وزیراعظم کے دورے سے پاکستان اور سری لنکا کے درمیان تعلقات کو مزید مضبوط بنانے اور کثیرالجہتی شعبوں میں باہمی تعاون کو فروغ دینے میں مدد ملے گی۔

Prime Minister Imran Khan to Visit Sri Lanka on 23-24 February 2021

About MH Kazmi

Journalism is not something we are earning, it is the treasure that we have to save for our generations. Strong believer of constructive role of Journalism in future world. for comments and News yesurdu@gmail.com 03128594276

Connect

Follow on Twitter Connect on Facebook View all Posts Visit Website