اسلام آباد(ایس ایم حسنین) کشمیری بھائیوں کی اپنے ناقابل تنسیخ حق خودارادیت کے حصول کے لئے کی جانے والی جدوجہدکی اخلاقی ، سیاسی اورسفارتی حمایت جاری رکھی جائے گی۔ دفترخارجہ کی ترجمان عائشہ فاروقی نے میڈیا کو ایک بیان میں کشمیر کے مظلوموں کیلیے پاکستان کی حمایت کے عزم کااعادہ کرتے ہوئے کہا ہے کہ عالمی برادری کو بیدار ہونا ہوگا اورکشمیرکے مسئلے کے پرامن حل کیلئے اپناکرداراداکرناہوگا۔ انہوں نے کہاکہ یہ بات قابل تعریف ہے کہ اسلامی تعاون تنظیم کشمیرکے نصب العین کی حمایت کے لئے آگے آئی ہے۔ ترجمان نے کہاکہ بھارت نے مذاکرات کے ذریعے مسئلے کے حل سے ہمیشہ گریز کیاہے اورمودی کے ہٹ دھرمی پرمبنی رویے نے علاقائی امن کوخطرے میں ڈال دیاہے۔