پولیس کے اینٹی کار لفٹنگ سیل نے کراچی میں ایک سال کے دوران 65 گاڑیاں چھیننے والے 2ملزمان کو گلستان جوہر میں کارروائی کرکے گرفتار کر لیا،ملزمان کےدیگر ساتھی فرار ہو گئے۔

ایس ایس پی اینٹی کار لفٹنگ سیل اسد رضا کے مطابق ملزمان لالہ نصیر اور محبوب جمالی کراچی میں گاڑیاں چھینے کی درجنوں وارداتوں میں ملوث ہیں۔

ملزمان دو روز قبل ہی جیکب آباد سے کراچی پہنچے تھے اور نئی واردات کی منصوبہ بندی کر رہے تھے کہ خفیہ اطلاع ملنے پر پولیس نے کارروائی کرکے گرفتار کر لیا جبکہ ان کے دیگر ساتھی فرار ہیں۔

پولیس کے مطابق دورانِ تفتیش ملزمان نے انکشاف کیا ہے کہ وہ گاڑیاں چھین کر سندھ کے شہر جیکب آباد کے راستے بلوچستان منتقل کرتے تھے۔

ملزمان جعلی کاغذات بنا کر چھینی گئی گاڑیاں کوئٹہ، تربت اور جنوبی پنجاب کے علاقوں میں فروخت کر دیتے تھے۔

ملزمان نے دوران تفتیش 2017 ءاور 18 میں 65 گاڑیاں چھینے کا اعتراف کرلیا ہے، ملزمان کے دیگر ساتھیوں کی تلاش میں چھاپے مارے جارہے ہیں۔