اسلام آباد(ایس ایم حسنین) نیدر لینڈ میں قائم سعودی سفارتخانے پر علی الصبح فائرنگ کردی گئی۔ غیرملکی خبررساں ادارے کے مطابق پولیس رہورٹ میں فائرنگ سے کسی کے ہلاک یا زخمی ہونے کی کوئی اطلاع نہیں۔ پولیس نے بتایا کہ دی ہیگ میں واقع سعودی سفارتخانے پر صبح 6 بجے فائرنگ کی گئی۔ڈچ وزارت خارجہ نے ایک بیان میں کہا کہ سعودی سفارتخانے پر فائرنگ کے واقعے کو انتہائی سنجیدگی سے لیا جارہا ہے اور ہم سعودی حکام کے ساتھ مسلسل رابطے میں ہیں۔ مقامی چینلز پر نشر ہونے والی تصاویر میں دیکھا جا سکتا ہے کہ گولیوں کے خول سڑک پر بکھرے پڑے ہیں جبکہ سفارت خانے کی کھڑی پر گولیوں کے نشان ہیں۔ ڈچ پولیس نے بتایا کہ مذکورہ واقعہ کے بعد تاحال کوئی گرفتاری عمل میں نہیں آئی۔ پولیس کے ترجمان نے بتایا کہ سعودی سفارتخانے پر فائرنگ کے پیچھے چھپے اسباب کے بارے میں کچھ بھی کہنا قبل از وقت ہے لیکن اس ضمن میں تحقیقات کی جاری ہیں۔ دوسری جانب سعودی سفارتخانے کی جانب سے جاری بیان میں واقعے کو ‘بزدلانہ حملہ’ قرار دیا گیاعلاوہ ازیں بیان میں کہا گیا کہ نیدرلینڈز میں موجود سعودی شہری محتاط رہیں۔ سعودی سفارتخانے نے واقعے سے متعلق فوری رد عمل پر نیدرلینڈز کے حکام کی تعریف کی ہے۔ بیان میں امید ظاہر کی گئی کہ وہ واقعے کی تحقیقات اور اس کے پیچھے موجود افراد کو انصاف کے کٹہرے میں لانے کے منتظر ہیں۔ واضح رہے کہ نیدرلینڈز میں سعودی سفارتخانے پر حملے کا واقعہ ایسے وقت پر پیش آیا ہے جب گزشتہ روز سعودی عرب کے شہر جدہ میں جنگ عظیم اول کے متاثرین کی یاد میں منعقدہ تقریب پر بم حملے سے متعدد افراد زخمی ہوگئے تھے جس میں کئی یورپی سفارت کار بھی شریک تھے۔اس ضمن میں فرانس کی وزارت خارجہ نے اپنے بیان میں کہا تھا کہ ‘جدہ میں غیر مسلموں کے قبرستان میں جنگ عظیم اول کے خاتمے سے متعلق سالانہ تقریب جاری تھی جس میں فرانس سمیت کئی قونصل خانوں کے عہدیدار شریک تھے’۔

FIRING, ON, US CONSULATE, IN, NETHARLAND