اسلام آباد(یس اردو نیوز) چین رواں ماہ کے دوران پاکستان کو کویڈ19 سے موثر انداز میں نمٹنے کیلئے مزید ایک ہزار وینٹی لیٹرز فراہم کرے گا۔پاکستان میں تعینات چینی سفیر یائو جِنگ نے ایمرجنگ پالیسی میکر انسٹی ٹیوٹ (ای پی آئی) کے زیر اہتمام آن لائن سیمینار سے خطاب کرتے ہوئے کہ کہ چین نے پاکستان کو اب تک 70لاکھ پرسنل حفاظتی آلات (پی پی ای) اور 600 وینٹی لیٹرز کے ساتھ ساتھ دیگر سامان فراہم کیا ہے، اس سے پاکستان کوکوویڈ 19 کا مقابلہ کرنے میں مدد ملے گی۔ انہوں نے کہا کہ چین کی حکومت وبائی امراض کے تناظر میں پاکستان کے طبی اداروں کا ستعداد کار بڑھانے پر بھی کام کر رہی ہے۔ قومی ترقی میں صوبہ بلوچستان کی اہمیت کو اجاگر کرتے ہوئے چینی نے کہا کہ بلوچستان کی ترقی پاکستان کی ترقی ہے کیونکہ یہ صوبہ وسائل سے مالا مال ہے۔ انہوں نے کہا کہ بلوچستان میں ہنر مند ترقیاتی مراکز کے قیام کے لئے بھی ایک معاہدہ طے پا چکا ہے۔یائو جنگ نے کہا کہ کویڈ19 صورتحال کے باوجود پاکستان میں تمام چینی کمپنیاں معمول کے مطابق کام کر رہی ہیں اور کسی بھی ملازم کو ملازمت سے فارغ نہیں کیا۔ انہوں نے مزید کہا کہ یہاں تک کہ چینی فرموں کے ساتھ کام کرنے والا ایک بھی ملازم وائرس سے متاثر نہیں ہوا۔یاو جنگ نے کہا کہ چینی کمپنیاں گزشتہ چھ ماہ سے اپنی پوری کوشش کر کے منصوبوں کو آگے بڑھا رہی ہیں۔ انہوں نے پاکستانی حکومت کی سمارٹ لاک ڈائون حکمت عملی اپنانے کی بھی تعریف کی جس سے کویڈ19 کے کیسوں میں کمی آنا شروع ہو گئی ہے۔انہوں نے کہا کہ چین کی حکومت ہسپتالوں کو بہتر سہولتوں سے آراستہ کرنے کا بھی منصوبہ بنا رہی ہے اور کہا کہ بیشتر سازو سامان صوبہ بلوچستان روانہ کیا جائے گا۔جمہوری وطن پارٹی کے صوبائی صدر نوابزادہ گوہرام خان بگٹی نے اس موقع کہا کہ چین پاکستان اقتصادی راہداری (سی پی ای سی) بلوچستان اور پاکستان کا مستقبل ہے۔