لاہور ( ویب ڈیسک) نیب ٹیم نے ایک تیر سے دو شکار کھیلتے ہوئے سابقہ سزا یافتہ وزیراعظم نواز شریف کی بیٹی مریم نواز کے ساتھ ساتھ انکے بھتیجے اور مریم نواز کے کزن یوسف عباس کو بھی گرفتار کر لیا۔ ذرائع کے مطابق یوسف عباس کو بھی آج نیب لاہور کی ٹیم نے طلب کر رکھا تھا لیکن انھوں نے بھی نیب کے سامنے جوابدہ ہونے سے انکار کردیا تھا۔ واضح رہے کہ یوسف عباس ، چوہدری شوگر مل منی لانڈرنگ کیس میں مطلوب ملزم ہے۔ یوسف عباس کو نیب ٹیم نے وارنٹ گرفتاری دکھاۓ اور انہیں اپنی تحویل میں لے لیا، یاد رہے کہ تھوڑی دیر قبل یہ خبر آئی تھی کہ نیب ٹیم نے مریم نواز کو گرفتار کر لیا ہے ۔ مریم نواز کوٹ لکھپت جیل میں اپنے والد نواز شریف کو ملنے کوٹ لکھپت جیل گئیں تھیں۔ نیب ٹیم نے مریم نواز کو اپنی تحویل میں لے رکھا ہے۔ ذرائع کے مطابق انھیں کوٹ لکھپت جیل کے باہر سے گرفتار کر لیا گیا ۔ کچھ روز قبل نیب نے انہیں چوہدری شوگر ملز منی لانڈرنگ کیس میں پیش ہونے کا حکم دیا تھا جس پر انھوں نے انکار کردیا تھا۔ مریم نواز کی پیشی کی تاریخ آج کی تھی لیکن انھوں نے نیب کو جواب دینے سے انکار کردیا ۔ مریم نواز کو تحویل میں لینے کے لیے نیب لاہور کی چار گاڑیاں کوٹ لکھپت جیل پہنچیں۔ کوٹ لکھپت جیل کے باہر موجود (ن) لیگی کارکنان نے فورا احتجاج کرنا شروع کردیا۔یاد رہے کہ قومی احتساب بیورو (نیب) لاہور نے مبینہ منی لانڈرنگ کیس میں مریم نواز ا ور انکے کزنز یوسف عباس اور عبدالعزیز عباس کو آج (جمعرات) طلب کر رکھا تھا ،پنجاب یوتھ فیسٹیول انکوائری کیس میں رانا مشہود احمد خان بھی آج نیب پیش ہونگے ۔ نیب نے مریم نواز کو گزشتہ پیشی پر غیر تسلی بخش جوابات دینے پر 8اگست کو دوبارہ طلب کیا تھا ۔نیب نے مریم نواز کو غیر ملکی شیئر ہولڈرز، چوہدری شوگر ملز، شمیم شوگر اور جعلی ٹی ٹی کے ذریعے کروڑوں کی منی لانڈرنگ کا چھ نکاتی سوالنامہ جاری کر رکھا ہے ۔