لاس اینجلس (ویب ڈیسک) ہم جنس پرستی جیسے غیر فطری فعل کی وبا نے مغرب میں بسے پاکستانیوں کو بھی اپنی لپیٹ میں لینا شروع کردیا ہے۔ گزشتہ دنوں پاکستانی اور بھارتی ہم جنس پرست خاتون نے اپنے رشتے کا ایک سال مکمل ہونے پر فوٹو شوٹ کرایا تو وہ دونوں ملکوں میں وائرل ہوگیا اب یہ خبر سامنے آرہی ہے کہ ایک پاکستانی ہم جنس پرست خاتون نے بھارتی لڑکی سے شادی کرلی ہے۔کولمبین نژاد بھارتی شہری بیانکا مائیلی اور پاکستانی خاتون صائمہ احمد کی ملاقات امریکہ میں ایک تقریب کے دوران ہوئی تھی جس کے بعد دونوں نے ایک دوسرے کے ساتھ وقت گزارنا شروع کیا اور بالآخر شادی کرلی۔اس ہم جنس پرست جوڑے کی شادی امریکی ریاست کیلیفورنیا کے شہر لاس اینجلس میں ہوئی جس میں بر صغیر کی روایتی رسوم و رواج کو اپنایا گیا۔شادی سے پہلے اس ہم جنس پرست جوڑے کی مہندی کی رسم بھی ہوئی جس میں دونوں اطراف کے گھر والوں اور دوست احباب نے شرکت کی۔شادی کے موقع پر پاکستانی خاتون صائمہ احمد دولہا بنیں اور انہوں نے شیروانی زیب تن کی جبکہ بیانکا نے روایتی ساڑھی کو ترجیح دی۔امریکہ میں بسنے اور شادی کرنے والے اس جوڑے کی تصاویر سوشل میڈیا پر وائرل ہورہی ہیں ، پاکستانی اور بھارتی سوشل میڈیا صارفین کی جانب سے اس جوڑے کو کڑی تنقید کا نشانہ بنایا جارہا ہے۔ ایک اور پاکستانی آرٹسٹ سندس ملک اور بھارتی لڑکی انجلی چکرا کا حال ہی میں کرایا گیا فوٹو شوٹ سوشل میڈیا پر وائرل ہوچکا ہے۔ دونوں خواتین ہم جنس پرست ہیں اور امریکی شہر نیو یارک میں مقیم ہیں۔ دونوں نے حال ہی میں بارش کے موسم کا ایک فوٹو شوٹ کرایا ہے جو سوشل میڈیا پر وائرل ہوگیا ہے۔ سندس اور انجلی کو ایک دوسرے کو ڈیٹ کرتے ہوئے ایک سال مکمل ہوچکا ہے۔ سندس ملک نے اپنے رشتے کا ایک سال مکمل ہونے پر تصاویر شیئر کیں ۔