اسلام آباد(ایس ایم حسنین) مسلم کمیونٹی میں کورونا ویکسینز کے بارے میں مثبت تاثر پیدا کرنے کیلئے برطانیہ کے شہر برمنگھم میں العباس اسلامک سینٹر کی انتظامیہ نے نیشنل ہیلتھ سروس اور مقامی فارمیسیوں کے ساتھ شراکت کرکے مسجد میں کورونا ویکسینیشن مرکز بنا یاہے۔ اس کے بعد العباس سینٹر برطانیہ کی پہلی مسجد بن گئی ہے جس نے ملک میں ویکسینیشن مہم کے ایک حصے کے طور پر اپنے احاطے کی فراہمی کی ہے۔ عرب خبررساں ادارے کے مطابق مسجد کے امام شیخ نورو محمد نے کہا کہ وہ اور ان کی جماعت برطانیہ کی ویکسینیشن مہم میں حصہ لیتے ہوئے خوشی محسوس کر رہی ہے۔ انہوں نے کہا ’یہ ہمارے لیے بہت کچھ ہے۔ اس نے ہمیں کورونا وائرس کے خلاف جنگ میں حصہ لینے کا موقع فراہم کیا ہے۔ ’میری کمیونٹی کے ممبران اس وبا کے خلاف عملی اقدام اٹھانے پر شاداں اور پرجوش ہیں۔ لوگ بلا شبہ اس کے بارے میں متحرک ہیں۔ شیخ نورو محمد نے کہا کہ یہ اقدام برطانیہ میں کچھ اقلیتی کمیونٹی میں کورونا وائرس کی ویکسینز کے بارے میں پھیلنے والی جعلی خبروں کا توڑ کرنے میں اہم ہے۔ امام مسجد نے کہا ’یہ بہت اہم ہے کہ ہم اپنی برادری کی جانب کورونا وائرس کی ویکسین کے بارے میں ایک مضبوط اورمثبت سگنل بھیجیں۔‘ان کا مزید کہنا تھا ’کچھ مسلمانوں کا خیال ہے کہ کورونا وائرس کی ویکسینز کے اجزا حلال نہیں ہیں۔ ہم یہ بتانے کی کوشش کر رہے ہیں کہ یہ سب جعلی خبریں ہے اور اس کا سب سےعملی طریقہ یہ ہے کہ اس ویکسین کو مسجد میں دیا جائے۔ نیشنل ہیلتھ سروسز کی کلیئر ڈیلی کے مطابق مسجد کو فائدہ ہے کہ وہ پہلے سے ہی ایک قابل اعتماد برادری کا مرکز ہے۔ انہوں نے کہا ’یہ مسجد بہت مصروف ہے۔ اگلے کچھ دن یہ مسجد مکمل طور پر بک ہے۔ یہ کمیونٹی کے اندر ایک مثالی جگہ ہے- ہم واقعی خوش ہیں۔

برطانیہ کے ویکسین کی تعیناتی کے وزیر ندیم زاہاوی نے کہا ’ ویکسین کے پروگرام کو اتنی تیزی سے پھیلتے دیکھنا حیرت انگیز ہے۔
این ایچ سی ہر ہفتے لوگوں کے گھر کے قریب اپنی کمیونٹی کے دل کے مقام پر مقامی فارمیسی سے لے کر مقامی مسجد تک رسائی حاصل کرنا آسان بنا رہی ہے۔‘

A, MOSQUE, IN, BRITAIN, DEDICATED, AS, CORONA, VACCINATION, CENTRE