counter easy hit

ایک اور بوم بوم : شاہد خان آفریدی کے بھتیجے کی قومی کرکٹ ٹیم میں شمولیت کی خبر نے کھیل کے میدان میں ہلچل مچا دی

واشنگٹن (ویب ڈیسک) پاکستان کی قومی کرکٹ ٹیم کے سابق آل راؤنڈر شاہد آفریدی نے اپنی دھواں دار بیٹنگ اور انتہائی مؤثر سپن بالنگ کے ذریعے پوری دنیا پر اپنا سکہ جمایا وہ پاکستان اور بھارت سمیت پوری دنیا مکیں بوم بوم کے نام سے مشہور ہیں ۔ مگر اب مداحوں کے لیے حیران کن خبر یہ ہے کہ اُن کے بھتیجے محمد عرفان آفریدی کی دنیائے کرکٹ میں اپنے چچا کے انداز میں آل راؤنڈر کے طور چھانے کو مکمل تیار ہیں ۔
محمد عرفان آفریدی یوگینڈا کی شہریت حاصل کرنے کے بعد یوگینڈا کی قومی کرکٹ ٹیم میں شامل ہو ئے ہیں ۔ اُنہوں نے اپنی زور دار اور تیز رفتار بیٹنگ کے باعث شائقین کرکٹ کی توجہ آغاز میں ہی حاصل کر لی ہے ۔ عرفان آفریدی نے گزشتہ برس ڈبلیو سی ایل ڈویژن تھری کے ایک میچ میں یوگینڈا کی طرف سے کھیلتے ہوئے 71 گیندوں پر 108 رنز کی دھواں دار اننگ کھیلی جس میں 10 چھکے بھی شامل تھے۔ اُن کی اس اننگ کے باعث یوگینڈا کی کرکٹ ٹیم ملیشیا کو شکست دینے میں کامیاب ہوئی۔ اس سال کے شروع میں اُنہوں نے ڈویژن فور کیلئے یوگینڈا کی طرف سے کھیلتے ہوئے صرف 17 گیندوں پر 51 رنز بنا کر اپنی ٹیم کو فتح سے ہمکنار کیا۔ بیٹنگ کے علاوہ بالنگ میں بھی اُنہوں نے شاہد آفریدی کے سٹائل میں باؤلنگ کراتے ہوئے متعدد بار اپنی ٹیم کو فتح سے ہمکنار کرایا۔ عرفان آفریدی کے ارادے ہیں کہ وہ اپنے چچا کی طرح ورلڈ کپ کھیل سکیں۔

اُن کا کہنا ہے کہ اُنہوں نے کراچی میں رہتے ہوئے صرف ٹینس بال سے کرکٹ کھیلی اور کبھی بھی کرکٹ کے مخصوص بال کے ساتھ نہیں کھیلا۔ بعد میں وہ جنوبی کوریا کے دارالحکومت سول میں ایک کمپنی کیلئے بجلی کی وائرنگ کا کام کرتے رہے اور یوں 24 سے 28 کی عمر میں اُنہوں نے کسی بھی قسم کی کرکٹ نہیں کھیلی۔بعد میں جب شاہد آفریدی کے بھائی مشتاق آفریدی نے یوگینڈا کے شہر کمپالا میں کاروبار شروع کیا تو اُنہوں نے اپنے بھتیجے عرفان کو بھی وہاں بلا لیا۔ عرفان وہاں گاڑیوں کی درآمد اور برآمد کے کاروبار میں اپنے چچا کا ہاتھ بٹانے لگا۔ اُنہوں نے ڈبلیو سی ایل ڈویژن فور کیلئے یوگینڈا کی ٹیم کی طرف سے کھیلتے ہوئے ٹورنمنٹ میں 15 وکٹیں حاصل کیں اور یوں یوگینڈا کی ٹیم اس ٹورنمنٹ کی چیمین ٹیم بن گئی۔ یوگینڈا کی قومی کرکٹ ٹیم کے کپتان راجر موکاسا کا کہنا ہے کہ ٹیم کیلئے عرفان کی کارکردگی نہایت اہم ہے اور وہ بہت محنت کر رہا ہے۔ موکاسا نے کہا کہ وہ نہ صرف بہترین بالنگ کر رہا ہے، بلکہ اپنے چچا کی طرح دھواں دار بیٹنگ بھی کرتا ہے۔
عرفان آفریدی کا کہنا ہے کہ اب شاہد آفریدی جانتے ہیں کہ وہ یوگینڈا میں کرکٹ کھیل رہے ہیں۔ عرفان نے بتایا کہ جب ایک اہم میچ کھیلتے ہوئے اُنہوں نے 17 گیندوں پر 51 رنز بنائے تو شاہد آفریدی نے اُنہیں ٹیکسٹ بھیج کر اُن کے کھیل کی تعریف کی۔ یوگینڈا کی قومی کرکٹ ٹیم کی کارکردگی کو دیکھنے والوں کا خیال ہے کہ وہ دن دور نہیں جب کرکٹ کی دنیا میں ایک اور بوم بوم آفریدی ایک بار پھر ایک بڑا نام ہو گا ۔