لاہور(ویب ڈیسک) سال 2018 تاریخ میں کچھ ناقابل فراموش واقعات کے انمٹ نقوش چھوڑ کر رخصت ہونے کو ہے۔ رواں سال ایک طرف الیکشن کی گہما گہمی، وزیراعظم کی شادی اور جسٹس فار زینب جیسے بڑے واقعات قومی افک پر نمایاں رہے تو دوسری طرف کچھ باہمت لوگوں نے اپنی جدوجہد کے سبب نمایاں کامیابیاں سمیٹیں۔سال 2018 میں سامنے آنے والے کچھ معروف ناموں نابینا جج کا نام بھی شامل ہے۔پنجاب یونیورسٹی کے ایل ایل بی (آنرز) کے گولڈ میڈلسٹ یوسف سلیم پاکستان کی تاریخ کے پہلے نابینا جج مقرر ہوئے۔سلیم یوسف نے عدلیہ کے تحریری امتحان میں پہلی پوزیشن حاصل کی تھی تاہم انہیں نابینا ہونے کی بنا پر انٹرویو میں فیل قرار دے دیا گیا۔یوسف سلیم ہر لحاظ سے سول جج کے لیے موزوں امیدوار تھے جبکہ قانون کے مطابق بھی معذور افراد کے لیے تین فی صد کوٹہ مختص ہے۔یوسف سلیم نے مسترد کیے جانے کے باوجود امید کا دامن نہیں چھوڑا اور چیف جسٹس آف پاکستان سے اس معاملے کا نوٹس لینے کی اپیل کی، چیف جسٹس پاکستان جسٹس ثاقب نثار نے ان کی نااہلی کا ازخود نوٹس لیتے ہوئے لاہور ہائی کورٹ اور متعلقہ سلیکشن کمیٹی کو دوبارہ انٹرویو لینے کی ہدایات کی تھیں۔رواں سال نومبر میں پاکستانی طلبا نے امریکی شہر بوسٹن میں جاری انجینئرڈ مشینوں کے بین الاقوامی مقابلوں (آئی جی ای ایم) میں کانسی کا تمغہ حاصل کیا تھا۔عالمی مقابلے میں 300 سے زائد ٹیموں نے حصہ لیا تھا جس میں ہاورڈ اور آکسفورڈ یونیورسٹیوں کے طلبا بھی شامل تھے۔پاکستانی شہر گوجرانوالہ سے تعلق رکھنے والی راولپنڈی میں رہائش پذیر باہمت خاتون شمیم اختر پاکستان میں تجارتی مال برداری کے لیے ٹرک چلانے والی پہلی خاتون ہیں۔ اپنے ایک انٹرویو میں شمیم اختر کا کہنا ہے کہ کوئی بھی کام مشکل نہیں ہوتا، بات صرف لگن، وقت کی پابندی اور محنت کی ہوتی ہے۔ خواتین میں وہ تمام صلاحیتیں موجود ہیں جن کو بروئے کار لاتے ہوئے وہ بڑے سے بڑا کام بھی کر سکتی ہیں۔آزاد کشمیر سے پہلی خاتون پائلٹ مریم مجتبی پی آئی اے کے فلیٹ میں شامل ہوئیں، انہیں قومی ایئرلائن نے اپنے آفیشل ٹوئٹر پیج پر ایک ویڈیو پیغام کے ذریعے متعارف کرایا تھا۔پاکستانی لیگ اسپنر یاسر شاہ ٹیسٹ کرکٹ میں تیز ترین 200 وکٹیں حاصل کرنے کا 82 سالہ ریکارڈ توڑ دیا۔آسٹریلیا کے بالر کلیری گریمٹ نے 1936 میں یہ ریکارڈ اپنے نام کیا تھا، اس کے بعد کوئی بھی بالر یہ اعزاز اپنے نام نہیں کر سکا تھا۔اسپین کے سلطان نے ابوظہبی میں نیوزی لینڈ کے خلاف جاری تیسرے ٹیسٹ میچ میں یہ ریکارڈ اپنے نام کیا۔وزیر اعظم عمران خان سمیت کئی سیاسی اور عوامی شخصیات نے یاسر شاہ کو مبارکباد کے پیغام بھجوائے۔نجی ٹی وی چینل نے ماریہ ملک نامی ایک خواجہ سرا کو نیوز کاسٹر کے طور پر متعارف کرایا جس کے بعد سوشل میڈیا پر ٹی وی چینل کے اس اقدام کو کافی سراہا گیا۔نیوز کاسٹر کے طور پر پہلی بار سامنے آنے والی ماریہ ملک اس سے قبل ماڈلنگ کے شعبے میں بھی اپنا آپ منوا چکی ہیں۔واضح رہے کہ پاکستان میں ہونے والی حالیہ مردم شماری کے مطابق ملک میں خواجہ سراں کی کل تعداد 10 ہزار چار سو اٹھارہ ہے۔پاکستانی اوپنر بلے باز فخرزمان نے رواں سال زمبابوے کے خلاف کھیلے گئے پانچویں ایک روزہ میچ میں تیزترین ایک ہزار رنز مکمل کر کے ویسٹ انڈیز کے سر ویوین رچرڈز کا ریکارڈ اپنے نام کیا۔سر ویوین رچرڈسن نے 21 جبکہ فخرزمان نے صرف 18 میچوں میں یہ سنگ میل عبور کیا۔ اسی طرح موبائل ٹیکنالوجی میں بھی پیش رفت ہوئی اور ایک نجی موبائل نیٹ ورک نے ملک میںپہلی بار 4.5 جی موبائل سروس متعارف کرانے کا دعویٰ بھی کیا۔پہلی بار پاکستان پیپلز پارٹی (پی پی پی) نے صوبہ سندھ کے پسماندہ ترین علاقے سے ایک ہندو خاتون کرشنا کماری کو سینیٹر بنایا، وہ نچلی ذات سے تعلق رکھنے والی ہندو کمیونٹی کی پہلی سینیٹر بنیں۔اسی طرح عام انتخابات کے دوران بھی تھرپارکر سے پیپلز پارٹی کی جانب سے قومی اسمبلی کے لیے انتخابی میدان میں اتارے گئے ہندو رکن مہیش ملانی نے پہلی بار جنرل نشست سے کامیابی حاصل کی، انہوں نے ہی صوبائی اسمبلی کی نشست پر بھی پہلی بار کامیابی حاصل کی تھی۔ملکی تاریخ میں پہلی بار عام انتخابات میں خواتین نے جنرل نشستوں پر ریکارڈ تعداد میں انتخابات لڑے۔ سال 2018 میں پاکستان نے پہلی بار اعلان کیا کہ وہ 2022 تک انسانی مشن خلا پر بھیجے گا۔پاکستان نے رواں سال ہی ایک اور سنگ میل عبور کرتے ہوئےچین کی مدد سے 2 سیٹلائٹ خلاء میں بھیجیں جو اس وقت تک درست انداز میںکام کر رہی ہیں۔ تاریخ میں پہلی بار حالیہ حکومت نے اہم ترین سرکاری عمارتوں کے دروازے عوام کے لیے کھولے، رواں برس سندھ گورنر ہاؤس کراچی کو عوام کے لیے کھولا گیا۔سندھ کے بعد پنجاب گورنر ہاؤس لاہور کو بھی عوام کے لیے کھول دیا گیا۔سندھ اور پنجاب گورنر ہاؤسز کے بعد خیبر پختونخواہ کے گورنر ہاؤس کے دروازے بھی عوام کے لیے کھول دیے گئے۔