لاہور (نیوز ڈیسک) وزیراعظم عمران خان کا نیا پاکستان ہاؤسنگ اسکیم کے لیے پہلا ٹھوس اقدام سامنے آیا ہے۔میڈیا رپورٹس میں بتایا گیا ہے کہ وزیراعلیٰ پنجاب عثمان بزدار نے ہاؤسنگ اسکیم کے لیے 5 ہزار ملین روپے جاری کرنے کی سمری پر دستخط جاری کر دئیے۔وزیراعلیٰ کی منظوری کے بعد سمری کابینہ کی خزانہ کمیٹی کو بھجوا دی گئی ہے۔ اس رقم سے 3 اور 5مرلے کی کم لاگت والے 5480 گھر تعمیر کیے جائیں گے۔لودھراں، چشتیاں اور رینالہ خورد میں مکانات تعمیر کیے جائیں گے۔وزیراعلیٰ عثمان بزدار نے ہاؤسنگ اسکیم کے لیے 5 ارب روپے کی منظوری دے دی۔واضح رہے کچھ روز قبل وزیراعظم عمران خان کی زیرصدارت نیاپاکستان ہاؤسنگ پراجیکٹ کے حوالے سے اجلاس ہوا۔اجلاس میں نیا پاکستان ہاؤسنگ ٹاسک فورس نے وزیراعظم عمران خان کو گھروں کی تعمیر میں پیشرفت سے متعلق بریفنگ دی تھی۔ وزیراعظم عمران خان نے نیا پاکستان ہاؤسنگ پراجیکٹ کے راستے میں حائل رکاوٹیں دور کرنے کی ہدایت کی تھی۔وزیراعظم نے کہا تھا کہ نیا ہاؤسنگ پاکستان پراجیکٹ کا جلد آغاز چاہتے ہیں۔ 50لاکھ گھروں کی تعمیرکا منصوبہ حکومت کیلئے بہت اہم ہے۔ 50لاکھ گھروں کی تعمیر سے معیشت کا پہیہ چل پڑے گا۔ گھروں کی تعمیر سے نوجوانوں کو نوکریاں بھی ملیں گی۔ 50لاکھ گھروں کی تعمیرکا عملی آغاز جلد چاہتے ہیں۔ی۔خیال رہے پاکستان تحریک انصاف نے ملک میں موجود غریب عوام کے لیے 50 لاکھ گھروں کی تعمیر کا اعلان کیا جس پر عملی اقدامات کیے جا رہے ہیں۔ ابتدائی طور پر جن سات شہروں میں رجسٹریشن شروع کی گئی ان میں وفاقی دارالحکومت اسلام آباد، فیصل آباد، سکھر، ڈیرہ اسماعیل خان، کوئٹہ، گلگت اور مظفر آباد شامل ہیں۔ تاہم بعد میں نیا پاکستان ہاؤسنگ اسکیم کو 19 شہروں تک وسیع کر دیا گیا تھا۔ حکومت کی جانب سے یہ فیصلہ ملک میں موجود غریب عوام کی شرح کو مد نظر رکھتے ہوئے کیا گیا تھا۔