لاہور(ویب ڈیسک)موٹرسا ئیکل سواروں کے ہیلمٹ پہننے سے متعلق ہائیکورٹ کے حکم پرکل(اتوار) سے عملدرآمدہوگا۔لاہور ہائیکورٹ کے فیصلہ کے مطابق موٹر سائیکل پر ہیلمٹ نہ پہننے والے افرادکوپہلے مرحلے میں ایک ہزارروپے جرمانہ کیاجائے گاجبکہ دوبارہ خلاف ورزی کرنےوالے کی موٹرسائیکل بندکردی جائے گی۔واضح رہے کہ لاہورہائیکورٹ کے جسٹس علی اکبرقریشی نے
موٹر سائیکل سواروں کے لئے ہیلمٹ لازمی قراردیاتھا اور 23ستمبر تک آگاہی مہم چلانے کی ہدایت کی تھی۔جبکہ دوسری جانب وزیر ریلوے شیخ رشید نے آئندہ ماہ سے تین نئی ٹرینیں چلانے کا اعلان کردیا۔لاہور میں پریس کانفرنس کرتے ہوئے وزیر ریلوے شیخ رشید نے کہا کہ سابق وزیر نے کس کس کو ریلوے اراضی لیز پر دی رپورٹ مانگ لی ہے، ریلوے کے مالی حالات بہتر کرنے کے لیے دوقیمتی پلاٹ فروخت کروں گا۔انہوں نے کہا کہ ریلوے ملازمین کی شدید کمی کا شکار ہے، محکمے میں 23 ہزار نئی بھرتیوں کی ضرورت ہے، ہم 10 ہزار افراد فوری بھرتی کرنا چاہتے ہیں۔شیخ رشید نے بتایا کہ 10 سال قبل ریلوے میں 10 مال گاڑیاں چلتی تھیں اور آج بھی وہی چل رہی ہیں، سال کے آخر تک 15 مال گاڑیاں چلائیں گے، کراچی خالی جانے والی مال گاڑیوں کے کرائے میں 50 فیصد کمی کا حکم دیدیا ہے۔وزیر ریلوے نے تین نئی ٹرینیں چلانے کا اعلان کرتے ہوئے بتایا کہ لاہور سے فیصل آباد نان اسٹاپ ٹرین یکم اکتوبر سے چلے گی، موہنجوداڑو اور روہی ایکسپریس 16 اکتوبر سے چلیں گی، موئن جوداڑو ایکسپریس لاڑکانہ، سیہون شریف اور جامشورو تک چلے گی، روہی ایکسپریس پنوں عاقل، گھوٹکی، ڈھرکی، صادق آباد، رحیم یار خان اور خان پور تک چلے گی
جب کہ ٹریک کی صورتحال بہتر ہوتے ہی ٹرینوں کی اسپیڈ 160کلو میٹر فی گھنٹہ کردیں گے۔شیخ رشید نے کہا کہ 7 ریلوے ڈویژنل ہیڈکوارٹرز میں ریزرویشن کے اوقات 4 گھنٹے بڑھا کر رات 12 بجے تک کردیئے ہیں، ملتان، سکھر، کراچی، راول پنڈی اور لاہور کے ریزرویشن کے اوقات رات12 بجے تک ہوں گے جب کہ 30 دسمبر تک ریلوے کی ریزرویشن کے اوقات 24 گھنٹے کردی جائے گی، لاہور ہیڈکوارٹرز سے ریلوے کا بڑا حصہ کراچی منتقل کیا جارہا ہے۔وزیر ریلوے نے بتایا کہ تمام ریلوے ملازمین کو ایک گریڈ ترقی دینے کی سمری وزیراعظم کو ارسال کردی ہے جب کہ خوشحال خان ایکسپریس کے حادثے کی تفصیلی رپورٹ 30 ستمبر تک طلب کرلی ہے۔ایک سوال کے جواب میں شیخ رشید نے کہاکہ نواز شریف کی رہائی کے بارے میں ڈیل کی خبروں کا کوئی علم نہیں، اس بارے میں شہباز شریف بہتر بتاسکتے ہیں البتہ نواز شریف کی کرپٹ حکومت پاکستان کا ستیاناس کرگئی، حکومت کو یومیہ 6 ارب روپے سود دینا پڑ رہا ہے۔